صحوة لتجديد الحب والحياة في بيتك

السلام عليكم حبيباتي
ايه رأيكم نبدأ مع بعض بس بجدية ولوجه الله تعالى ليس إلا نستفاد ونفيد
ان مش هقول جديد بس هو احياء للسنة النبوية بس بطرق عصرية
وحاجات بسيطة مش هتكلفك حاجه
على فكرة الموضوع في دماغي من زمان بس الجميلة دنيا وردودكو عليها خلتني بعد اذنكوا افتح باب النقاش
الامر بسيط
اولا احنا هنتفق انه بيت هادي (حتى لو فيه مشاكل) لكن نقصاه روح صح ( روح دعابة ضحك حنان عطف مودة خوف على بعض .........) متفكريش الحاجات دي مش موجودة فيكي وفيها وفيه هو كمان تعالي كده تكوني عيانه ولا هو عيان ولا ابنكوا عيان (بعد الشر ع الكل ) بتتلهفوا على بعض ازاي وكمية الحنا والحب بتفيض ازاي _ طبعا ممكن البعض في نفسه يقول انتي متعرفيش حاجه مفيش حاجه من الكلام ده- جايز
بس انتي اتفقتي معايا من الاول الموضوع لربنا مش عشان حد بس ربنا مش هيخلصه تعملي حاجه ليه ومش هيجازيكي بيها - طب ما احنا ممكن نتمنى على ربنا اللي احنا عاوزينه يجازينا بيه هو مش الجزاء من جنس العمل طب يلا ننوي مع بعض يارب انا هراعيك في بيتي ويارب جازيني في بيتي برده وفي جوزي وولادي

مش هقول الراجل عاوز ايه ولا هم مش مكفيهم احنا مش مخلينهم محتاجين حاجه و و و ..............
لا احنا هنفتح قلبنا ونصفي نفوسنا من الحاجات الوحشة وخصوصا اللي من اجوازنا او الطرف التاني عموما خطيب او زوج ونبدأ صفحة جديدة هاه يلا اقلبي الصفحة وافتحي واحدة جديدة
هاه فتحتي طيب
اول صفحة عاوزة تكتبي فيها ايه
هقولك انا انتي نفسك في ايه
عاوزة طبعا تكتبي كككككككككككككل الحاجات الوحشة اللي بتحصل منه او بتحصل عامة في الحياة معاكي بداية كويسة عارفه ليه
عشان انتي لما تبداي بالوحش هتعرفي تلاقي الحلو زي الدكتور لازم يعرف المرض عشان يديله علاج مظبوط
يبقى اول خطوة
1- هاتي اجندة واكتبي فيها كل اللي بيدايقك مش شرط كلام تفصيلي لا ممكن تكون كلمة نقصك تسمعيها (احبك) اكتبي الكلمة ما هو ده اصلا ورقة المسودة للحاجات الوحشة نقصك حنان ... وهكذا ( وعلى فكرة مش بس في البيت ممكن الشغل اي حاجه)- احنا خلاص من انهارده هنعيد حسابتنا ونقف مع نفسنا مش كده ولا ايه ركزي معايا
2- طيب ما تيجوا بقى نرتب النقط اللي كتبناه او الملحوظات يعني على حسب الحاجه اللي محتاجاها اوي او الوحشة اوي اللي لازم تتعدل
3- تعالوا نبدا نشتغل على حاجه حاجه ونشوف بقى علاجها ايه
ملحوظة: قلنا مش بالضرورة تكون فيه حاجه وحشة بس مفيش الحلو زي مسك الايد والازي منه صح يعني مفيش روح يعني التنفس صناعي طب ما يلا نخليه طبيعي مستنين ايه
طبعا للخصوصية مش عاوزين تفاصيل بس عاوزين طرح ممكن للمشكلة بشكل عام او ممكن طرح للحل يعني عاوزاه يتعود يمسك ايدي ما هو ده حل للحنا ن والاحساس بالاخر ممكن بدل ده وده نطرح افكار للصلح للمودة لخلق جو رومانسي بعد فترة جفاء
يلا نروي الارض بميه عاذبة ولا نسيبها تبور ولا نرويها ميه صرف صحي بقى
براحتك بس غيرك هيروي بالميه العاذبة
ومش قصدي غيرك واحدة تانيه اعوذ بالله لا صديق اه صديق هو انتي معودة جوزك تكوني ليه صديق
ام اه ام حماتك عودي سعادتك جوزك على انك تديله شوية من حنان امه
اخت ايون اخت ليه في الشدة وقلبك عليه قبل اي حد
وطبعا حبيبة وديه انا اضمن بعمري ان كلكم راسبين فيها مع سبق الاصرار والترصد
وطبعا الزوجة بقى هتقوليلي لسه فاكراها دي اول حاجه لا تبقي غلطانه في بداية الجواز هي اول حاجة بس مع الاولاد والمسؤلية والتعود اصلا كمان مهياش اول حاجه بالعكس بالشخصيات اللي فاتت ديه انتي تقدري تخليها اول حاجه


انا هقف هنا وهكمل الموضوع بعد ما اسنع الاراء والمشاركات
وان شاء الله هجبلكوا عروض ومقترحات منقولة للعمل بها طبعا مش للقراية
ومعلش طولت عليكوا
بس اللي محتاج بجد وقفة مع نفسه احنا مع بعض لحد بر الامان ولو على سبيل التغير مش اكتر